مسابقه شعبيه من الطراز الاول

[فلاح العجمي]

بسم الله الرحمن الرحيم


اخواني اعضاء وزوار منتديات ذوق

اقدم لكم مسابقه شعبيه اتمنى ان تحوز على رضاكم

وقبل ان اطرح لكم المسابقه احب ان اخبركم كيف اقتبست فكرتها

يحكى ان احد امراء قبيلة شمر (لا يحظرني اسمه) قد طلب من الشعراء الحاظرين بمجلسه

ان يبدعو قصيده ويختتمونها بكلمتان هما ((بيت النمله))

فعجز الشعراء عن ذلك عدى الشاعر الكبير عبدالله بن سبيل رحمه الله

فأنشد قائلا



لا والله الا شدوا البدو نجاع = كلن هدم مبناه وأرتد زمله

اقفو ودنو للحنى كل مطواع = وكل اشقراً محلا قرينه وزمله

الا ان قال


ياعود موزاً ناعمن للتمرياع = ومنين ماهب الهوى مال حمله

حبه يخج القلب مايوجع اوجاع = لا شك قلبي مودعه (بيت نمله)

من هنا اقتبست الفكره

واسمحو لي اخواني ان اطرح المسابقه :

وعلى كل شاعر يرغب بالمشاركه ان يختتم الابيات بكلمتان هما

((ثقب الابره))

.

.


طرحت هذه المسابقه في منتديات اخرى ولكن

لم اجد حتى الان ذلك الشاعر المتمكن عدا القليل

فهل انتم لها ?


انتظركم

[محمد الفرحان]

.

.

مرحبا بك يافلاح

وحياك الله بيننا

وكل الشكر لك على هذه المسابقه التي سيكون لها

مردودها على مرتادي هذا القسم

.

.


والان لنبداء :

بأستقبال قصائد الشعراء حول طلب الشاعر فلاح العجمي

والتي يجب ان يكون اخر كلمتين بالقصيده :

( ثقب الابره )



.

.


فمن هو الفارس الاول ؟
.

.

الموضوع :

مثبت

وبأنتظار شعرائنا

.

.

وللجميع فائق تقديري واحترامي

[سلطان الدوسري]

السلام عليكم .... وصباحكم ورد وفل وياسمين
فلاح العجمي .. هلا وغلا مليوووون
وأهلا بهكذا قدوم ... اسعدني تواجدك هنا بيننا
واسعدني هذا الموضوع ... وأحببت أن اضع متواضعتي بين
ايديكم .. فلعلي قد وقفت ..


" دونت إنتر " .. هالمكان مجدولينه لين ياء=ابجديه في غلا ماتنكتب من غير خِبره
بلّغيهم ياحياتي .. لو نبي بالحرف حاء=قلت حبّ وكل حرف(ن) انتثر من دون حِبره
وان بغيتي من دلالي قلت اجرب حرف باء=بالبقا تبقين وسطي والجفا مافيه دِبره
إيه ياقلبي أحبّك .. لو تبين الحرف طاء=" طَارَ سُهْدٌ مِن عُيُونِي قدْ مَلَكْتُ الأرضَ شِبْرَه "
ومن دخلت بوسط قلبك / ذقت فيه ومااشاء=مدلّعتني .. مريّحتني .. معطيتني عين سِبره
والدخول اهو الدخول وللخروج نقول لأ=ادخليني يابعدهم .. لو أمرّ بثقب الابره

فلاح ... شكرا لك ولقدومك ولطرحك ..

دمت بخير

[وجد الكتابه]

سلطان الشعر


اتعبت الشعراء من بعدك






فكره رائعه



متابع لها بقوه

[فلاح العجمي]

يابعد راسي ياسلطااااااااااااااااااااااااان

" دونت إنتر " .. هالمكان مجدولينه ليـن يـاء
ابجديه في غلا ماتنكتـب مـن غيـر خِبـره
بلّغيهم ياحياتي .. لـو نبـي بالحـرف حـاء
قلت حبّ وكل حرف(ن) انتثر من دون حِبـره
وان بغيتي من دلالي قلت اجرب حـرف بـاء
بالبقا تبقيـن وسطـي والجفـا مافيـه دِبـره
إيه ياقلبي أحبّك .. لـو تبيـن الحـرف طـاء
" طَارَ سُهْدٌ مِن عُيُونِي قدْ مَلَكْتُ الأرضَ شِبْرَه "
ومن دخلت بوسط قلبك / ذقت فيـه ومااشـاء
مدلّعتني .. مريّحتني .. معطيتني عيـن سِبـره
والدخول اهـو الدخـول وللخـروج نقـول لأ
ادخليني يابعدهم .. لـو أمـرّ بثقـب الابـره



اشهد بالله انك سلطان على اسمك




صح لسااااااااااااااااااااااااااانك مليوووون



واختار كلمتين غير (ثقب الابره)


ونشوف مبدع اخر



اخوك

[سلطان الدوسري]

وجد الكتابه ... سلمت ياغالي ..

فلاح العجمي ... يسلم راسك يابعدي ..
وصح بدنك كثر مليونك مرتين ..

واختياري للكلمتين هي :

" مشكاة زيت "

[جود الرباط]

جئت مدونة اعجابي بثقب ابرة

للسلطان سلطان


لله درك

[الكايد]

هلا والله فلاح
تسلم يمينك
الموضوع رائع ومشوق
الله لايهينك

سلطان الشعر
حسبي الله على من يلومني فيك
كفو كفو
ولايهنون لاخوان

تحياتي

[وجد الكتابه]

عزتي لك يا زماني ما عطيت الشعر قدره
كل شاعر شاف نفسه فطحلٍ من كم بيت

ذا يقول انه شبيه البحتري لا طال عمره
وذا يقول اني وهبت النفس للساحه وعطيت

وذا يقول اني كتبت الشعر واستنفذت صبره
وذا يقول الشعر فيني يرتقي يومٍ رقيت

وكل هذا الامر عادي ساحةٍ والساحه قشره
لكن المشكل في راعي لكزس وراعي وانيت

ذا يقول اكتب قصيده تنتهي في ثقب ابره
وذا يقول اكتب قصيده تنتهي بمشكاة زيت
:)

[بحر الهوى]

الله عليك

يابو وليد

مبدع

صح لسانك :)

ولاهنتو جميع

[سلطان الدوسري]

وجد الكتابه ...........

هلا بك يابعدي .. وصح لسااانك
لكن تراها ماهي تحدي .. هي مشاركة فقط
وبعدين انت لم تستخدم الكلمه المطلوبة " مشكاة زيت "
بتوظيفها وماتعنية بدلالتها .. انت فقط ادرجتها ككلمتين
قيلت من فلان .. ولكن صح لسانك ولاتهون انت وحروفك ..

واختر كلمتين لمن يأتي بعدك


دمتم بخير

[فلاح العجمي]

عزالله ياسلطان اللي حطك مستشار المنتدى ماغلط


اعتقد ان اذا كل شاعر اختار الكلمتين بأسلوب وجد

يعني يقول فلان بعدين الكلمتين

اعتقد ان المسابقه بتصير ممله

[محمد الفرحان]

.

.

صح لسانك يابووليد

وبانتظارك لأختيار الكلمتين الجديده

.

.


للجميع فائق تقديري واحترامي

[وجد الكتابه]

سلطان الشعر

صح كلك يا الغالي


ادري ان المسألة ماهي تحدي واعرف ان شعراء ذوق لا تصعب عليهم مثل هذه الطلبات :)


انا مشيت على على الطلب الذي لم يحدد غير قصيده وباخرها كلمتين من دون التطرق الى كيفية وجود الكلمتين


يمكن حبيت أوضح ان فعلا الموضوع مافيه تحدي للشعراء

واستخدمت طريقه لتلبية الطلب يمكن محد فكر فيها :)

عموما لا اعتقد ان الذي سيأتي بعدي سيقلد هذه الطريقه

ربما تظهر أفكار لا نتوقعها


......................

فلاح العجمي
صح كلك يا الغالي

ومن له حيلة فليحتال :)

لا فلاح أكيد المسابقه بتكون مملة طبعا اذا الكل استخدم نفس الطريقه اللي استخدمتها

لكن خلنا نقول " سبق بها عكاشه "


الكلمتين اللي اختارهم هما


" عرش بلقيس "

[سلطان الدوسري]

هاهي لكم .. لعلّها تحوز على الرضاااااا



لامن طلبني نور عيني على الراس=وشلون ماانفذ .. ترى الحب تقييس
كل الأوامر تصدر بشعر واحساس=يكتب بيوته يطلب الشعر تنفيس
ولامن طلبني مستحيل اني انحاس=جاهز لنور العين ولافيه تبليس
ايه إلك وإلك وإلك وكلّه من انفاس=من حرّها ذابت تماثيل رمسيس
ينفذ لك أمر وناخذه دوم نبراس=قولي طلبك ولو يجي عرش بلقيس


الكلمتين المطلوب بها ختم القصيدة " تمثال حرّية "

[محمد الساري]

السلام عليكم ورحمة الله وبركاتة

فكره جدا رائعه واعجبتني وحبيت اجرب معاكم




هاك ,, سطر ,,إحفظ ,, الابيات عندك
..........................................."" طار طيري ماوقعت بحب غيـــره
بكتبه بين(( القوافي )) سيــد سيـــدك
..........................................."" واعقده مابين قلبي و ثقب الابره




مجرررد تجربه :)


شكرااا لقلوووبكم

[وجد الكتابه]

صح لسانك يا سلطان الشعر


مبدع دائما

لا هنت يا القرم



انا من يوم حبيتك عرفت ان المحبه ذوق
عرفت ان الهوى يصبح معك احلام ورديه

احبك موت يا عمري واجي من لهفتي والشوق
اسولف للقمر عنك واقول الحب بدريّه

رحيق الشهد بشفاتك يناديني تعال وذوق
وانا في نشوة العاشق اخاف اذوب موليّه

تلومين بدوي حده يذوق التمر والمرقوق
فديتك خلني اوّل اباخذ صوره فوريّه

تعالي وقفي هنيّه ورزي طولك الممشوق
كذا ايوا كذا قلبي يمين شوي يا عنيّه

أبيها تكون للذكرى محبة عاشق ومعشوق
ونكتب خلفها كانت تحت " تمثال حريّه "



الكلمتين " عدنان ولينا "
:)

[فلاح العجمي]

صح لساااااااااااانك ياوجد

مبدع




حنا نبيها من تراث الجزيره = يالله طلبتك ياألهي تعينا

من شوف عيني بالعلوم الخطيره = العارفينا بينهم ضايعينا

ان جيت الد الشوف تعمى البصيره = هزل المعاني مايجي كالسمينا

قلنا حداثه واكملوها مسيره = راحو وغنو ياولد ماكرينا

ماباقي الا تسمعون الاخيره = مسحوب لكن بسم ((عدنان ولينا))


الكلمتان

((دودة القز))

[بدر ابن نايف]

السلام عليكم


"
"


فالشعر والقيفان يااهل المعزه
نرقا على القمه وننهل من العز

والبيرق البيرق طويلن مرزه
فالمجد والامجاد يرفع ويرتز

وطويق ثابت محد قادر يهزه
راسي الوتد فالارض ياكيف يهتز

وحنا الشعر حنا كسبنا ملزه
جمال الحمول وحصن فى ساعة الز

طفلن ولد فى نجد قمنا نبزه
حتى غدا مثل النداوى ليا فز

ينومس اهل الدار لون نوزه
يرفض حداثات وخبر دودة القز


الكلمتان...

الحكم للسلطه

[محمد الفرحان]

.

.

شعرائنا الكرام

يحق لنا ولمنتدى الذوق ان نفاخر بكم

دمتم بهذه الشاعريه وبأنتظار فارسنا

القادم . .

.

.

للجميع فائق تقديري واحترامي

[فلاح العجمي]

ينومس اهل الدار لون نوزه
يرفض حداثات وخبر دودة القز


الله عليك يابو نايف


وخبر دودة القز


صح لسااااانك




وننتظر مبدع اخر

[محمد الساري]

مجرد محاوله ,, ان ماقبلتوها ,, ماراح ازعل


ليتها عدت سلامة ,, طيش و هبال \
عنقه فريده صابت القلب جلـطه
-------
اصل الحكايه ضمنها شوق ,, وخبال
مريت صدفه بين الاسواق ,, غلطه
------
بنيت بالصدفه ,, طموحات ,, وآمال
لاشك شفت العدل ,, و الحكم للسلطه


والكلمتين

(( شاشة بلوتوث ))

[بدر ابن نايف]

السلام عليكم


هلا يافلاح العجمى


اشكرك على هذى الفكرة الجميله اللى من خلالها نضع انفسنا فى اختبارات
ولكن ياليت تضع للفكره شروط حتى نمشي عليها ولا نختلف




تقبل














تحياتى

[مبارك بن مسفر]

يا سلام والله
بس مثل ما قال أخوي بدر بن نايف الشروط على شان يكون فيها نظام واستمراريه

فكرة رائعة واللي جابها اروع



الجود ماله حد يا عارفينا=لو كان يعمل له دراسات وبحوث
والناس واجد جعل ربي يعينا=كثر الجراد اللي على الارض مبثوث
وبعض العرب في عرفهم قاصرينا=يقدر يحصره وسط شاشة بلوتوث


(سواق الاجره)

[بدر ابن نايف]

السلام عليكم





ابطو الربع ماردو




يامبارك المسفر عريب الجدودى
معنا ووزن وقاف ماهى بعسره

نرقا وترقا فى طويل وسنـــــودى
فى مرقبن عرش مع النسر نســـره

واليا وردنا فى شراب العــــدودى
لازم نكون يافنتا الجود اســـــره

وسط العرين اسود ورثة اســودى
وانت الاسد يمناه للطيب جســره

طيب ولد طيب ودايم بـــزودى
والجود متربع بعرشه وقصــره

مير البلا فملطمات الخـــدودى
عضمن هشيش وهين اليوم كسره

وان عودت للقاف قلنا العنـودى
ماتت وفيها من عنا الوقت حسره

معزبة مكتب يجيب الهنــودى
مقهوى وطباخ وسواق الاجـره




"
"
"



تحياتي للجميع



.. الكلمات

طيب ولكن

[محمد الطويان]

السلام عليكم

شكرا جزيلا

لك أخي / فلاح موصولا للأخوه ،

وعلومكم غانمه ياوجوه الخير ، والوقت سيف ،

لاهنتو جميعا وإن وجدتموني متطفلا ( تحرير ) ،

ولي ملاحظه بسيطه وقد تكون للأمانه سبب دخولي بنسبه كبيره

مع التقدير للجميع وأتشرف بمصاحبتكم هذه الرحله ، ولكن

حقكم أكبر من هكذا مرورا عابر ، وأتمنى أن يساعفني الوقت ،

في قابل الايام ، القريبه بمشيئة الله ، وملاحظتي هنا أخي

الشاعر / فلاح العجمي الابيات التي منها :

*

حبه يخج القلب مايوجع إوجاع
000000000000 لاشك قلبي مودعه بيت نمله

*

ليست للشاعر / إبن سبيّل إنما هي للشاعر : فهيد المجماج

الملقب براع ( الاثله ) وهي منطقه من نواحي ( السر ) ،

وشكرا مره أخرى وتفضلوا :


ماقول أنا عندي مواثيق وصكوك = على القوافي والقوافي علىَ كن
ولو المعاني بابها اليوم مصكوك = سميت أنا ياحروف شعري (علاكن )
وإن كان قوم الطيب بالطيب خصوك = أقول فوق وطيب قومي علاكن
أهل المواقف بالمواقيف وصوك = أمـّا يـبـين الطيب والا بلاكن
وإن كانهم بعلوم وعلوم نصوك = مافيه مسلم بالنقايص بلاكن
وإن كان ياحروفي مع الدرب قصوك = بعض العرب معروف طيّب ولكن ؟



دمتم سالمين

والمطلوب ( ضواحي مدركه )

والتحيه للجميع ،

[سلطان الدوسري]

محمد الطويان ........ هلا وغلا .. وياحبيلك فديتك
انشهد انها للمجماااااااااج .. وعلى مسمع من أذني
من أبي رحمه الله تعالى .. وقد سمعها من جدّه .. وجدّه
عاصر " المجماج " كونه قريب له فالمجماج في " المذنب "
وجدّي في " السر " وكان حينها " ابن ناهض " يشتغل " صبي "
عند المجماج حين قام الاوّل وقتل " الصوينع " ولجأ الى قصر " عامر " آنذاك .


محمد ... أحسنت أيها الرائع .
معلومه : طفولتي ومراهقتي كلها في " السر " .

[مبارك بن مسفر]

الشاعر بدر بن نايف


ما عليكم زود وكفو لها من غير قصور في خويانا

من مثلكم مايصعب عليه القاف


تحيتي وتقديري لك

[بدر ابن نايف]

السلام عليكم



وسط المحك شعار نلعب بالحـــــــروف
واللى مهو شاعر تصيبه دربكــــــــه

واحدن يشوف واحد مش قادر يشــــوف
واحدن مع الشعار مافيه بركـــــــه

وان عودت حرب الفكر وابلا ســـيوف
خشم المعانى فالقوافي نفركــــــه

نذبح جمل ولا بعد نذبح خــــــروف
والشاعر الشاعر يروس المعركـــــه

وان كان ما للشعر فالماقف حلــــوف
ضاع الشعر من مسلكه فى مسلكــــه

واكبر مصيبتنا فى ضراب الدفـــــوف
اللى يطبل للركيك ويشبكــــــــه

لكن على الله ياعسي الصبر امخــلوف
نمسي ونصبح فى ضواحى مدركـــه
"
"
"


... الكلمات


التلفاز والشاشه

[مبارك بن مسفر]

كفو والله




يابدر نايف نظمت الشعر واسويته=معروف بالجزل ما قد جيت بهشاشه
أنا اشهد انك تدل الدرب ما اخطيته=شاعر مخضرم عريب الجد يالباشه
في وقتنا اللي يمل الشعر من بيته=من شوف شي يخلي الفكر منداشه
لا شفت منهو تعبّث فيه كبيته=أشوم عنّه..ما اريد ازوال غشّاشه
بعض العرب قال بحر الشعر عديته=ومن العمى قال جبت افكار حشاشه
يلزم شراب الحموضه لا من اوحيته=مثل الزبد جاتك القيفان جياشه
أكبر هدف ينتشر عند العرب صيته=والحلم الاكبر هو التلفاز والشاشه

((الكلمه))

(القرآن والسنه)

[بدر ابن نايف]

السلام عليكم





الله الله




الله الله



ياسلام عليك




ماعلك زود


صح الله السانك ولاهنت




تقبل

تحياتى

[بدر ابن نايف]

السلام عليكم



الحلم الاول هو التلفاز والشاشه
للضايع اللى يشوه فننا وفنه

بشتٍ قطيفي وتحت البشت دشداشه
ديكور شاعر ولحدٍ داريٍ عنه

مابقي الا يشيل الخبل قرقاشه
ونقول شاعر مع الشعار لكنه؟

ظبي وراس الظبي مايشبع اعراشه
والحمد لله سبحانه مع المنه

مير المنقش يجى رزقه بمنقاشه
اللي بلانا عسي الايام يبلنه

منحاش مدرى المعانى منه منحاشه
يزعل ليا قلت بيت الشعر ذا غنه

وحنا لحاف الشعر غطاه وافراشه
شعار نمشي على القران والسنه

"
"
"
الكليمات


التين والخوخه

[بدر ابن نايف]

السلام عليكم




ياجماعه وينكم

[محمد الطويان]

عليكم السلام

هلابك يابدر

صدقني مادريت إلا قبل شويه ،

أنا قلت الموضوع قفلّوه ، وإلا جاء له طلب ،

مالك إلا الرضا أنت والشعر



ياهل المواقيف وأهل الطيب والمعنى = أشعار بعض العرب عوجا ومنسوخه
أقولها للرجال اللي هنا معنى = موروثنا شيخ طيْب وضايع ٍ جوخه
مافيه واحد ذكي والذيب وألمعنا = حنّا رجاله وقوم المجد وشيوخه
ماهمّنا واحد ٍ بالصوت صدّعنا = ثور ٍ كلامه لجوج ويجلب الدوخه
لأقبل يبابي وبالعنوان فزّعنا=ورع ٍ يطقطق مع الغفلات بشروخه
بالله يابدر إبن نايف وتسمعنا = قلّه مضيّع دروب التين والخوخه

والبقا والسلامه للجميع

المطلوب

( هونج كونج )

وأجمل تحياتي ،

[بدر ابن نايف]

السلام عليكم



الله الله



الله الله



الضاهر ما الا انا وانت والربع نيام


علم اللى يحبون الضجيج
المعانى كما الخفرات غنج

والتواصيف للفكره حجيج
كنها راكبه من فوق رنج:)

فى بلاد العرب ولا الخليج
ياعرب والعرب ماهم بزنج:)

من يسمى رفيقه بالرفيج
مثل من صار فالميقاف كنج:)

مير انا قاطف ازهار الاريج
لو طريق الحمادى صار طنج

القصايد كما الطفل الخديج
نذبحه لو نبي نعطيه بنج

من حرير وزبردج له نسيج
ميد يعرب ولاهو هونج كونج


"
"
الكلامات
وص وص

[بدر ابن نايف]

السلام عليكم



الله الله



الله الله



الضاهر مابه الا انا وانت والربع نيام


علم اللى يحبون الضجيج
المعانى كما الخفرات غنج

والتواصيف للفكره حجيج
كنها راكبه من فوق رنج:)

فى بلاد العرب ولا الخليج
ياعرب والعرب ماهم بزنج:)

من يسمى رفيقه بالرفيج
مثل من صار فالميقاف كنج:)

مير انا قاطف ازهار الاريج
لو طريق الحمادى صار طنج

القصايد كما الطفل الخديج
نذبحه لو نبي نعطيه بنج

من حرير وزبردج له نسيج
ميد يعرب ولاهو هونج كونج


"
"
الكلامات
وص وص

[بدر ابن نايف]

السلام عليكم



وينكم ياجماعه

[بدر ابن نايف]

السلام عليكم



اخوانى المشرفين ارجو تفعيل هذى المسابقه ووضعها فى مكانها الصحيح وتثبيتها



عشان من خلالها يكون التنافس الشريف فى المعانى والقوافي



ارجو اخذ الموضوع بعين الاعتبار

لكم تحياتى