نــزفٌ مُــنـفـرد !

[محمد الذرعي]

.

عندي كلام أكثر من اللي سمعته = لكن حكا رمشك .. وكل الحكي ضاع
سَـلْـهَم وسولَف .. وانتثر ما جمعته = مثل الخرز لامن تناثر على القاع !
هذا وحكـْيـِك توّنـي ما شبعـتـه = وشلون أجل لا ذاب صوتك بالأسمـاع؟

.

[محمد الذرعي]

صاحبي .. ما كل ما يلمع ذهب = كم بشوشٍ ما عـرفنا مذهبـه
لو سخا لك بالعطـا.. مما وهب = لا تصدّق من يقول إنـْه ذهبـه

[محمد الذرعي]

مرّه .. بعد مرّه .. ثلاثـه .. وأربـع = ناديت له .. وإذنـه جـِـفـَتْ كـل داعـي
وغيـّر مساره من عقب كان يتبـع = خطوات رجلي في جميع المسـاعي
أوّل .. يجي صوبي بـ "تأشيرة إصبع" = واليوم .. ألوّح بـ "العشر" .. ما يراعي!

[محمد الذرعي]

.


وش عليها ..
ما حدٍ يرضى عليها
وتشـّر وكلٍ يجيهـا
لا هوَت بـدرٍ تعـلاّ
بالسما .. رحّب وهلاّ
وإن تغـلاّ ..
ما تجي له .. هو يجيها
وش عليها ..

...

ما تبـيه .. إلاّ تنـاله
لو هو ضرب مْن استحاله
لا بغت نجـمٍ عجبها
من قبل ترخي هدبها
يمسي النجم بيديهـا
وش عليها ..

.

[محمد الذرعي]

عـز الله إن آمالـنـا .. راحت مراويح القطـا = وضاع الهوى .. واللي هوى مع قصة الحب القديم
وعـز الله إن أحلامنـا .. طيـّارة "محمد عطـا" = أمست على كف السما ! ثم أصبحت كومة رميم !

[محمد الذرعي]

تدري وش أكبر خطر دايم يهددني؟ = الكلمه اللي على سمعي ترددهـا
كلمة "حبيبي" تلمني .. ثم تبددني = وتتودّد لقلبي .. ويقبـل توددهـا
وأجيك أشيل السلاح اللي يحددني = نيشانك لرميـةٍ صوبي تـسددهـا!

[محمد الذرعي]

يا حبيبي وصلنا كل ما تيسـّر = وعن يمينك جيت .. جنّبت امتيـاسر
شف نظيرٍ داخله حلمي تكسـّر = مثل أسـيرٍ منكسر بيدين آسـر
وإسمع لنبض الخفوق اللي تحسـّر = كن في وسطـه زفافٍ للدواسر !

[محمد الذرعي]

يا طامح براس "الشمالي" تدوسه = ما حقـّـقـَتْ نسبة طموحك ولو سدس
وهقوَتـْك والله خايبـه ومْعكوسـه = وهقواي مبنيـّه على منطق وحدس
العاقل .. يفكـّر قبل سلْ موسـه = والثور .. بأوّل ثورتـه يكثر الندس
كانك تبي تحجب سناه وتحوسـه = عُمر الضيا ما يحجبه منخل العدْس
وكانك حسبت ترجـّع الود "بوسه" = بالبوس " أبوعمّار " ما رجـّع القدس!

[محمد الذرعي]

مدّيت كف الوفا شكراً وعـرفانـاً = للموقف اللي جمعني فيك شخصيـّـاً
وشرّعت باب الغرام لقلبك .. إيمانـاً = منّي بأنك معي مرتاح نفسيـّـاً
يا صاحبي والهوى وإن كان "مجانـاً" = ترى الضرايب معَك تفرق حسابيــاً!
وقلبي تعَب يطلبـك بِـراً وإحسانـاً = على الأقـل .. ريـّح المحتار حاليــاً
أحيان أحسّك تبي لاماي .. وأحيانـاً = أحسّك بتنهي العِشره نهائـيـّـاً

[محمد الذرعي]

يا عذول .. الله حسيبك يا عذول = لا تساومني على الغالي ترى
لو تقول اللي عن أحبابي تقول = ما اْستمع لك .. ما آتكلّم .. ما أرى
والحبيب الوافي .. العف .. الخجول = أكبر مْن اللي على بالك طرى

[محمد الذرعي]

لا تنكـّس راسك وخلّك جريء = ذِلـّة الروس الكبار .. الطأطأه
وإعترف لي لا تقول أنك بريء = ما اقتنع باللكننه واللألأه
وكلمةٍ بين الشفايا والمريء = لا تموّتها بكثر التأتأه
كلمتك مثل النجوم اللي تضيء = وفي عيونك شفتها متلألأه
قول : أحبك يا غلاي وْ لا تسيء = الظنون بقلب .. حبك يملأه

[محمد الذرعي]

صحيح .. قدّمت لي قلبك على كفــّــك = لكن خذيت العمر في كفــّـك الثاني

[محمد الذرعي]

أرجع وترجع مثلما كنت غالي = إليا حصَـل شيٍ بعيدٍ حصولـه
مثل .. هبوطك يا "الزعيم الهلالي" = أو ياخذ "النصر السعودي" بطولـه!
أو البحر يصبح قراحٍ زلالي = وينثر على الشطـّان درّه ولولـه
أو تلمع النجمات وقت الزوالي = والعام يتبرّى من أربع فصولـه
أو العرب تفعل كلامٍ يقـالي= أو "بوش" يقرن كلمته في فعولـه!

[محمد الذرعي]

يا روح منهـو للهوى يستلـذّي = يا فرحتي .. يا غايتي .. يا ملاذي
يفداك قلبٍ من غلاك امتغـذّي = ويفدنـّك الثنتين هاذي @ وهاذي @

[محمد الذرعي]

برمي التعب والمسافه والزمن خلفي = وأقهر عناد الزمان وقسوة ظروفي
دام الأمل .. والصبر .. والحب .. في حلفي = وشوقي لعينك عقيدٍ وحّد صفوفي
عزيمتي ما كسرها ميلك الألفي = وْلا ردّني مبعد ديارك ولا خوفي
حتى لو أنّك مثل "جدّه" عن "الزلفي" = أحسّك أقرب من أنفاسي إلى جوفي
بمشي وأسج القدم لحماك يا ولفي = وإن تعبت أقدامي أمشي لك على كفوفي
وإن تعْبَت كفوفي وصار الهوى صلفي = بزحف وأشيل العنا لجلك على كتوفي
وإن ما وصلتك قبل نور الفجر يلفي = إرسل على جثتي .. وإقطع رجا شوفي