حفنة أبيات !

[محمد الذرعي]

.



أوّل .. غلاك بداخل القلب الأول = وإسمك مدوّن في سجل الأوائـل
لكن الأول يـا حبيبـي تحـوّل = وأصبحت رقمٍ ما دخل بالمسائل


.

[محمد الذرعي]

.



لو هو صحيح الهوى رميه بلا رامي = ما كان سود الليالـي حلّلـت دمّـي


.

[محمد الذرعي]

.



يا كيف طاحت صورتك من عيوني = وأنت الذي وسط العيون امتمركـي
الياس وقّـف دون قلبـك ودونـي = من يوم غرّوك العـواذل بتَركـي
وقاطعتني يـوم المـلا قاطعونـي = وغديت كنّي (مُنتـجٍ دانمركـي)!

.

[محمد الذرعي]

.



خبّروا من صوّب الرمح العوَج = (الوفي) من طعنة الغادر نجـا
يوم جوْ له بالهجوم المـزدوَج = (الرّدي) و(الحاقد) بليل الدجـا
الله أكرم عبده بوقت الحـوَج = وما يخيب اللي لفضل الله رجا


.

[محمد الذرعي]

.



الفرق واضح بيـن همّـي وهمّـك = شتّان مـا بيـن السخـي والبخيلـة
أكبر همومي .. كيف أزاحم غلا أمّك = وأكبر همومك .. صبغتك للجديلـه!

.

[محمد الذرعي]

.



صحت .. لين الصوت بالظلما تبدّد = يا حبيب الروح لا تنـوي بعـادي
ثم رجع صوتي على سمعي وردّد = يا منادي .. لاحياة لمـن تنـادي


.

[محمد الذرعي]

.



قلبي يفيض بغلاه إن مال لأحبابه = مثل (المرش) لا تمايل ينتثر طيبه


.

[محمد الذرعي]

.



الله وأكبـر! كـل هـذي عيـوبـي؟ = ما كنّك اللي قلت : ما شفت بك عيب!
العام مُعجب جابـك الحـب صوبـي = واليوم صارت كل صفاتي عذاريـب


.

[محمد الذرعي]

.



ما تصالحنا .. ولا طاح الحطب = لا ولا طبنا من الجرح العطيب
وأنت طبعك موسمي مثل الرطب = بس ثلاث أشهر .. وتسعه ما يطيب
كل حرف إعجاب قلناه انشطب = من عقب جفّيت يا الغصن الرطيب


.

[محمد الذرعي]

.



300 إسـم فـي لستـه أرقامـي = ربع وقرايب وجيران و بني عمّـي
ما فيهم اللي يضمّد جرحي الدامـي = ولا فيهم اللي يحس بزلزلة همّـي
إلاّ هواي .. ومُناي ومصدر إلهامي = عسى الوصل دايمٍ من يمّه ويمّـي


.

[محمد الذرعي]

.



على كيفك .. وسوّ اللي طرا لك = ولكـن لا يقاطعنـي وصالـك
أنا يـا سيّـدي بيـن الأيـادي = يمينك تامر .. وتنهى شمالـك
لقيت بنظـرة عيونـك مـودّه = تلـوم القلـب لا دوّر بـدالـك
ولقيت بديرة أطباعـك مطامـع = تحرّضني على حرب احتلالـك
أحبك .. ثم أحبك .. ثم أحبـك = ألا يا كثر ما قـد قلتهـا لـك


.

[محمد الذرعي]

.



رجعت لي عقب الجفا رغـم أنفـك = والشوق جابك غصب عنْك لحبيبـك
أمسيت .. بعنادك وصـدّك وعنفـك = وأصبحت .. برضاك وحنانك وطيبك
ما قلت لك ! عقدة مجافـاك تنفـك = واللي خذاك اليوم .. باكـر يجيبـك


.

[محمد الذرعي]

.



أنـا قلبـي مـن الفرقـا تلـوّع = جريح .. ومن نظر جرحي تروّع
حديث الطب كلّـه مـا نفعنـي = ولا الكيّـه ولا رقيـا المطـوّع


.

[محمد الذرعي]

.



يا صاحبي لا تشكي الهـم واليـاس = لا دار دولاب المقـاديـر عكـسـي
إصبر على ما صابك وقول : لا باس = ما دمت متعافي .. وماكل .. ومكسي
ترى الرضا فيما كتب خالق النـاس = أحلى من السكر وطعم (الجلكسـي)!


.

[محمد الذرعي]

.



ما كتبت أغلى القصايد من فراغ = وأنت وصفك كوكبٍ صعب البلوغ
الشعر في غير حسنك ما يصاغ = وإن كتبته في هوى غيرك يروغ


.

[محمد الذرعي]

.



نفس السؤال اللي يراودني العام = لازال في فكري ولا احدٍ يجيبه
ليه انتهت حلو الليالي والأيام؟ = وأقفى ولا برّر دواعي مغيبه؟


.

[محمد الذرعي]

.



يا اللي جمعتيني معه في فوادك = ما يجتمع سيفين في غمد واحـد
تخيّري منهو يحقـق مـرادك = والفرق واضح بين وافي وجاحد


.

[محمد الذرعي]

.



جتني رساله .. وقلت الغالية (غاده) = يالله عسى وصلها دايم ولا نْعدمـه
وأثر الرساله من الهاتف كما العاده = سدّد رسومك قبل لا نفصل الخدمه!


:)

.

[محمد الذرعي]

.



حالي وحالك كنّه الفرق مـا بيـن = دمعة فلسطيني .. وضحكة يهودي
الأول .. أبكاه القهر في فلسطيـن = والثاني .. أضحكْته سواة الجنودي!

.